|
|
Dómur um Maður með mönnum II
(Morgunblaðið, 11. ágúst 2007)
MYNDLIST - START ART
Karnivalísk ofgnótt
Maður með mönnum II, Dagný Guðmundsdóttir
"... þær búa m.a. yfir myndrænum eiginleikum sem skírskota til karlmannsímyndar klassískrar fornaldar –
en þær lýsa jafnframt karllægum heimi þar sem konan er utanveltu."
VEGGIR sýningarsalarins á efri hæð Start Art listamannahússins eru nú nánast þaktir ljósmyndum af holdi.
Þar sýnir Dagný Guðmundsdóttir undir yfirskriftinni "Maður með mönnum II" nærmyndir af líkömum fáklæddra karlmanna
í ýmsum fangbrögðum. Þar sést t.d. olnbogi þrýstast upp að loðinni bringu og vöðvaþaninn, æðaþrútinn handleggur krækja
í annan útlim. Stundum er ekki gott að segja hvaða líkamshlutar eru á ferðinni. Í myndunum eru erótískir undirtónar sem
gætu höfðað til kvenna – þær búa m.a. yfir myndrænum eiginleikum sem skírskota til karlmannsímyndar klassískrar fornaldar –
en þær lýsa jafnframt karllægum heimi þar sem konan er utanveltu. Karlleg fyrirferðin endurspeglast í sjónrænni ofgnótt mynda,
sem vissulega mega skiljast sem skopstæling ýktrar "karlmennsku", en sýningin þarfnast þó tilbreytingar – og meiri skerpu –
í úrvinnslu eða uppsetningu.
Anna Jóa
|
|
